وُہ مُطلقہ ہے تو بانجھ ہم بھی ہیں۔

آج   آپکے سامنے میں  اپنے تین عزیز دُوستوں کے گھر کی کہانی پیش کرنا چاہُونگا۔ جِسکو پڑھنے کے بعد آپکو کہانی کا ٹائٹل عجیب نہیں لگے گا۔ بلکہ مجھے قوی یقین ہے۔ کہ کالم کے اختتام تک پُہنچنے سے قبل ہی ہماری سُوچوں میں ہم آہنگی پیدا ہُو چکی ہُوگی۔۔۔۔ البتہ فرعونیت جِن کا وطیرہ ہے۔ یا جو صنف نازک کو غلام سے ذیادہ اہمیت دینے کو تیار نہیں۔۔۔ اُن کو میں صرف دعوت فکر ہی دے سکتا ہُوں۔۔۔ کہ اگر کبھی توفیق مِلے تو اتنا ضرور سوچیئے گا۔ کہ یہ عورت آخر آئی کہاں سے ہے۔۔۔؟؟؟  کِس کے وجود کا حِصہ ہے۔۔۔؟ کیا ہر مرد میں ایک عورت نہیں ہُوتی ۔۔۔۔؟اُور کیا ہر عورت میں ایک نامکمل مرد پوشیدہ نہیں ہُوتا۔۔۔۔؟اُور اگر یہ عورت ہی نہ ہُوتی (جِسے تمام فساد کی جڑ گردانا جاتا ہے) تو ذرا عالمِ تصور میں جاکر سوچئیے تو سہی۔۔۔ کہ،، اِنکے بِنا  یہ دُنیا کتنی  بے رُونق بے رَنگ اُور بلیک اینڈ وائٹ ہوتی۔۔۔ ؟؟

میری پہلی کہانی میرے  دُوست ریاض الحسن  کے گھر سے شروع ہُوتی ہے۔ جو ایک گورنمنٹ کے اِدارے میں کم و بیش بیس برس سے کلرک سے ھیڈ کلرک کے منصب پر فائز نہایت ایمانداری سے اپنے فرائض کی بجاآوری میں مصروف عمل ہیں۔ نہ حرام کھاتے ہیں۔۔۔ اُور نہ کسی کو حرام کھانے دیتے ہیں۔ اُنکی انتہائی محدود آمدنی کے باوجود بھی اُنکے بچے اعلی تعلیم کے زیور سے آراستہ ہیں۔۔چار بیٹیوں کے بعد بڑی منت مُراد سے مانگے گئے دُو بیٹوں کی پیدائش کے باوجودبھی اُنکی محبت اُنکا رجحان آج بھی بیٹیوں کی طرف ذیادہ ہے۔

سب سے بڑی بیٹی  تنزیل نے جیسے ہی  بی کام میں پوزیشن حاصل کی۔۔۔ تبھی اتفاق سے ایک شادی کی تقریب میں کسی دوسرے شہر سے آئی ایک  خاتون کی نِگاہ تنزیل کے حسین چہرے پر پڑی۔ جو کہ شادی میں شریک تمام بچیوں میں کسی پری کی مانند دِکھائی دے رہی تھی۔ اُنہوں نے تنزیل سے بات چیت کے دوران اُنکی فیملی کے متعلق کُرید کرید کر معلومات حاصل کی۔۔۔ اُور ٹھیک ایک ہفتے بعد وُہ تنزیل کا رشتہ لے کر اُنکے گھر  چلی آئیں۔۔۔ ریاض الحسن صاحب نے  جواب دینے کیلئے کچھ مہلت طلب کی۔۔۔ جسکے جواب میں اُن خاتون نے اگلے ہفتے تک پھر آنے کا کہا اُور واپس لُوٹ گئیں۔۔۔

ریاض الحسن صاحب  نے  دُو دِن میں سرسری معلومات حاصل کرلیں۔۔۔ جس میں اُنہیں یہ بتایا گیا۔کہ،، لڑکا بھی انتہائی خوبصورت ہونے کیساتھ کافی خاموش طبع  اُور اعلی تعلیم یافتہ ہے۔۔۔ اُور کسی بھی بُرے فعل میں ملوث نہیں ہے۔۔۔ اُنکا اپنا کپڑے کا کارخانہ ہے۔۔ اُور وُہ لوگ کافی رہیس ہُونے کیساتھ ساتھ نہایت شریف الطبع واقع ہُوئے ہیں۔۔۔

ریاض الحسن یہ معلومات حاصل کرنے کے بعد  اپنی قسمت پر پُھولے نہیں سماتے تھے۔۔۔ اُنکی بیگم بھی اِس رشتے کو قُدرت کی غیبی مدد سے تعبیر کررہی تھیں۔۔۔ کہ کم از کم اب تنزیل اپنی باقی عمر غربت زدہ ماحول میں نہیں ۔بلکہ عیش و عشرت کے ساتھ بسر کرسکے گی۔۔۔ اِس لئے اگلے ہفتے جب وُہ خاتون دُوبارہ معلوم کرنے کی غرض سے آئی۔تو ریاض الحسن صاحب نے خُوشی خوشی یہ رِشتہ قبول کرلیا۔۔۔۔ لڑکے والوں کو شادی کی جلدی تھی۔۔۔ وُہ لُوگ شادی کے بعد دُولہا دُلہن کو ہنی مُون کے بجائے حج پر بھیجنے کی خُواہش رکھتے تھے۔۔۔ رِیاض الحسن صاحب خُود غربت کی وجہ سے ایک  مُدت سے دیار حبیب ﷺ کی حاضری کیلئے ترس رہے تھے۔۔۔ لیکن تنزیل شادی کے بعد  حج کیلئے روانہ ہُوگی۔ یہ سُوچ سُوچ کر ہی اُنکی رُوح سرشار ہورہی تھی۔

تین مہینے  کی مختصر مُدت میں ریاض الحسن صاحب نے لڑکے والوں کا اِسٹیس دیکھتے ہُوئے۔ جہیز و شادی کی تمام تیاری کیلئے  اپنی تمام جمع پُونجی کے علاوہ اپنے بھائی سے چند لاکھ روپیہ اِس شرط پر حاصل کرلیا۔ کہ تین برس بعد ریٹائرمنٹ مِلتے ہی سب سے پہلے اُنہیں رقم ادا کردی جائے گی۔۔۔ میں اگرچہ اُس شادی میں اپنی  نجی مصروفیت کی وجہ سے شامل نہیں ہُوپایا۔۔۔ لیکن مجھے  کسی نے بتایا  تھا کہ،، ریاض الحسن صاحب نے  تنزیل کی شادی کی تقریب  کو اتنا شاندار بنادیا تھا۔ کہ لڑکے والے بھی عش عش کر اُٹھے تھے۔

شادی کے دوسرے دِن  جب  ریاض الحسن صاحب اپنی فیملی کیساتھ دعوت ولیمہ میں شرکت کیلئے تنزیل  کے سُسرال پُہنچے۔ تو تنزیل نے اپنی والدہ کو علحیدگی میں ایک ایسی کہانی سُنائی ۔ جسے سُننے کے بعد تنزیل کی والدہ غم کی شِدت سے اپنے اُوسان کھو بیٹھی۔۔۔ تنزیل نے اپنی والدہ کو بتایا کہ جس لڑکے سے اُس کی شادی کی گئی ہے۔۔۔ وُہ تمام رات اُس سے معافی مانگتا رَہا ہے۔۔۔۔ کیونکہ اُس میں قُدرتی طور پر  ایک ایسا نقص موجود ہے۔ جسکا علاج کسی کے پاس موجود نہیں ہے۔۔۔۔ جسکی وجہ سے وُہ  کبھی زُوجیت کے حقوق پورے نہیں کرپائے گا۔۔۔ اُور اُس لڑکے کے بقول اُسکے والدین کو تمام کہانی معلوم ہے۔۔۔ لیکن وُہ لوگوں کے طعنوں سے بچنے کیلئے اِس اُمید پر تنزیل کو بیاہ لائے ہیں۔ کہ کبھی نہ کبھی تو اِس مرض کا  علاج بھی دریافت ہُوہی جائے گا۔۔۔تنزیل کو چُونکہ اپنے والدین کی غربت اُور اَپنی مزید تین بہنوں کی شادی کی فکر بھی لاحق تھی۔ اسلئے اُس نے اپنی امی سے لاکھ کہا کہ،، وُہ اُس لڑکے کیساتھ گُزارا کرلے گی۔۔۔ لیکن جب ریاض الحسن بھائی تک اُنکی بیگم کے توسط سے یہ خبر پُہنچی تو  وُہ صدمے سے نڈھال لڑکے کے والد کو ایک طرف لے گئے۔

ریاض الحسن کا خیال تھا۔کہ،، شائد لڑکا کسی اُور لڑکی کو پسند کرتا ہُوگا۔ جس نے والدین کے دباوٗ میں آکر تنزیل سے شادی تو کرلی ہے۔ لیکن اب اپنی جان چھڑانے کیلئے جھوٹ بول رَہا ہے۔۔۔ لیکن لڑکے کے والد کی مسلسل خاموشی کے بعد معافی نے ریاض الحسن کی آنکھیں کھول دیں۔ وُہ انتہائی شریف انسان ہیں۔ چاہتے تو بھری محفل میں لڑکے کی تمام فیملی کو تماشہ بنادیتے۔۔۔ لیکن صرف اتنا کہہ کر تنزیل کو واپس گھر لے آئے۔کہ،، آپ نے میری تنزیل کو کہیں کا نہیں چھوڑا۔۔۔ ہمارے معاشرے میں تو کنواری بچیوں کو آسانی سے رشتے نہیں مِلتے۔ پھر ایک دِن کی ہی سہی۔ لیکن شادی شُدہ لڑکی سے رِشتہ کون جوڑنا پسند کرے گا۔۔۔؟؟

ریاض الحسن بھائی کے ایما پر لڑکے نے چند دِن بعد تنزیل کو طلاق دے دی تھی۔۔۔ ایک برس تک شادی کا سامان مٹی کے ڈھیر میں بدلتا رہا۔ لیکن تنزیل کیلئے کوئی مناسب رشتہ نہیں مِل سکا۔۔۔ چند دِن پہلے اتفاق سے  ریاض الحسن بھائی سے سرراہ مُلاقات ہوگئی۔۔۔ تو اُنہوں نے تمام کہانی سُنانے کے بعد استدعا کرتے ہُوئے کہا،، عشرت بھائی تنزیل آپکی بھی تو بیٹی جیسی ہے۔ آپ ہی اُس کیلئے کوئی مناسب رشتہ ڈھونڈ دیں۔ میری تنزیل تو کنواری لڑکیوں جیسی ہی ہے۔ ۔۔ بس اُس بدنصیب پر شادی شُدہ کی مہر ثبت ہُوکر رِہ گئی ہے۔۔۔چاہے کوئی دوسری شادی کا خواہشمند ہی کیوں نہ ہُو۔ بس لوگ شریف ہُوں اُور اب ہم سے ذیادہ  جہیز کی ڈیمانڈ نہ کریں۔ تو میں تنزیل کو اُسکے ساتھ بیاہ دُونگا۔۔۔۔ تاکہ دوسری بچیوں کیلئے کچھ راہ کھل جائے۔

میرے ذہن میں دُو  دُوستوں کے رشتے تھے۔ ایک دُوست کی طلاق ہُوچُکی تھی۔  جبکہ دوسرے کو  کوئی مُناسب لڑکی نہیں مِل رہی تھی۔ دونوں کی عمر ہی ستائیس اٹھائیس برس کی ہُوگی۔ اُور دُونوں ہی بزنس مین ہیں۔۔۔ اسلئے میں نے ریاض الحسن بھائی کی ڈھارس بندھائی کہ انشا اللہ ایک ہفتے میں ایک نہ ایک رشتہ لیکر حاضر ہُوجاوٗں گا۔۔۔۔ میں نے اُسی دِن اپنے کنوارے دُوست سے رابطہ کیا۔ اُور اُنہیں بتایا کہ،، میں نے تُمہارے لئے ایک خوبصورت لڑکی دیکھی ہے۔ جو اعلی تعلیم یافتہ بھی ہے۔ اور نہایت شریف خاندان سے تعلق رکھتی ہے۔ وُہ صاحب کہنے لگے۔ عشرت بھائی جب آپ نے لڑکی دیکھ لی ہے تو۔ بس بسم اللہ کریں۔۔۔ میں نے کہا۔کہ،، لڑکی کیساتھ ایک مسئلہ ہے۔ انہوں نے استفسار کیا کیسا مسئلہ۔ ۔۔؟؟ تو میں نے اُس بدنصیب کی کہانی سُنادی۔۔۔ تمام کہانی سُننے کے بعد اُن کے چہرے پر کئی رنگ آکر گُزر گئے۔۔۔ آخر میں کہنے لگے عشرت بھائی،، مجھے تنزیل سے بے حد ہمدردی ہے۔ اُس بیچاری کیساتھ واقعی ذیادتی ہُوگئی۔ جہیز کی تو مجھے بھی پرواہ نہیں کہ،، مہینے کے دس بارہ لاکھ کما لیتا ہُوں۔۔۔ مگر میں کوئی ولی اللہ تو نہیں ہُوں۔۔۔ جو آنکھوں دیکھی مکھی نگل جاوٗں۔۔۔ اگرچہ وُہ کنواریوں جیسی ہے۔ مگر ہے تو مطلقہ۔ مجھے تو زمانہ نہیں جینے دیگا۔ کہ کنواری نہیں مِلی اسلئے مطلقہ کو بیاہ لایا۔۔۔

تمام رات میری آنکھیں تنزیل کی بدنصیبی پر نمناک رہیں۔۔۔ صبح ہُوتے ہی میں ایک نئی اُمنگ کیساتھ اپنے طلاق یافتہ دُوست کے پاس جا پُہنچا۔ میرے اِس دُوست نے تمام کہانی سُننے کے بعد میری ڈبڈبائی آنکھوں میں جھانکتے ہُوئے مجھ سے وعدہ کیا۔۔۔۔ کہ،، چاہے جو بھی ہُوجائے میں تنزیل کو اپنی عزت بنا کر ہی  دَم لُوں گا۔۔۔ میں نے وُہ تمام دِن بُہت خوش رِہ کر گُزارا۔ اُور یہی سوچتا رہا ۔کہ،، ابھی دُنیا اچھے لوگوں سے خالی نہیں ہُوئی ہے۔۔۔ اب بھی بے غرض اور مخلص لُوگ دُنیا میں موجود ہیں۔۔۔ لیکن یہ خوشی بھی ایک دِن سے ذیادہ قائم نہ رِہ سکی۔ جب میرے اِس دُوست نے مجھے بتایا کہ،، میں اپنے تمام گھر والوں کو راضی کرنے میں کامیاب ہُوگیا ہُوں۔۔۔ لیکن میری والدہ اُور میری بہنیں اِس رشتے کیلئے راضی نہیں ہیں۔ اُن کا کہنا ہے۔ کہ،، جب ہمارے گھر پر کنواری لڑکیاں دینے والوں کی لائن لگی ہے۔ تو کیا ہم لُوگ پاگل ہیں۔ جو ایک مطلقہ کو اپنے گھر بیاہ کر لائیں گے۔

 مجھے جب سے یہ جوابات سُننے کو مِلے ہیں ۔میں اکثر سُوچتا ہُوں۔ کہ،، تنزیل اگر  کنوار پن کے باوجود بھی مطلقہ ہے۔ تو  اخلاقی پستی اُور فکری بانجھ  کے حامل تو وُہ والدین بھی تھے۔ جو اپنے بیٹے کی نامردی کا علم رکھنے کے باوجود بھی کسی غریب کی بچی کو بیاہ لائے۔ اُور یہی  فکری بانجھ پن ہر ایک گھر میں نظر آتا ہے۔ جہاں ہمدردی تو کی جاتی ہے۔ لیکن کسی کا غم نہیں بانٹا جاتا۔۔۔ اُور اِس بانجھ پن کو سمجھنے کیلئے اتنا کافی ہے۔۔۔کہ،، ہم اُس رسول مہربان ﷺ کے اُمتی ہیں۔ جو دُنیا  و آخرت کی نعمتوں کے بااِذن پروردیگار مالک و مُختار ہونے کے باوجود۔ صرف ایک کنواری خاتون کو مومنوں کی ماں بننے کا شرف بخشتے ہیں۔ اور دس بیوہ و مطلقہ خواتین کو عزت کے تاج سے سرفراز کرتے ہیں۔

باتوں اُور دعووٗں میں چاہے کوئی قوم ہماری ہم عصر نہ ہُو۔۔۔۔ لیکن اخلاقی اُور عملی طور پر ہم ایک بانجھ قوم ہیں۔ جنکے خیالات کی رفتار  اتنی سست ہے کہ،،جیسے عقاب کے سامنے کوئی ممولہ ہُو۔۔۔۔ لفاظی کے تیروں سے ہم صرف اغیار کا ہی نہیں۔۔۔۔ اپنوں کا دامن بھی تار تار کرسکنے کا جگر رکھتے ہیں۔۔۔ بس نہیں رکھتے تو صرف لوگوں کے طعنوں کو سننے کا حوصلہ نہیں رکھتے۔۔۔ ایک مطلقہ کیساتھ ہمدری تو کرسکتے ہیں۔۔۔۔ مگر اُس کے سر پہ عزت کی چادر نہیں تان سکتے۔

مزید دو کہانیاں لکھنے کی فی الحال نہ تاب ہے۔ نہ حوصلہ۔۔۔ جیسے ہی یہ حوصلہ جُٹا پانے میں کامیاب ہوگیا۔ آپکی خدمت میں پیش کردونگا۔ آپ سب بھی تنزیل کیلئے دُعا کیجئے گا۔ کہ،، ریاض الحسن بھائی جِس دِن مجھے دوبارہ ملاقات کیلئے آئیں۔ تب تک میں کسی اللہ کے ولی کو  تنزیل کیلئے ڈھونڈنے میں کامیاب ہُوجاوٗں۔ کیونکہ ایسے کام تو بقول میرے دُوست اللہ کے ولی ہی کرسکتے ہیں!