جسے چاہے جو عطا کر۔۔۔ مُجھے عشق دے خُدایا

  

بسم اللہ الرحمن الرحیم

محترم قارئین کرام میں صبح اپنی فیکٹری کی طرف جاتے ہُوئے سوچ رہا تھا۔ کہ اگر مجھے اپنے بلاگ پر واپس لکھنے کی اجازت مِل گئی تو اپنا پہلا آرٹیکل کس عنوان سے لکھوں گا۔۔۔۔؟ فیکٹری پُہنچ کر  میں اپنے  کام میں مصروف ہُوگیا۔ البتہ نجانے کیوں میں نے اپنا سیلولر فون بھی آن کرلیا۔۔۔ چند لمحے بھی نہ گُزرے تھے کہ،، کراچی سے محترم اُویس بھائی کی کال  آنے پر میں نے  اُن سے بات کرنے کیلئے خُود کو راضی کرتے ہُوئے کال ریسیو کرلی۔ مجھے یاد ہے کہ  انہوں نے میرے  آخری کالم،، پر بُہت جذباتی ایس ایم ایس کیا تھا۔ جسکی وجہ سے مجھکو انکی بے قراری کی خبر ہُوئی۔ آج بھی اُنکی یہی خُواہش تھی کہ مجھے لُوٹ آنا چاہیئے۔ یوں تو مجھے کامران  عظیمی بھائی، کاشف اکرم بھائی، عنبل صاحبہ ، ثقلین بھائی، عاصمہ شوکت، عائشہ جی، ارشاد محمود  وجاہت وارثی بھائی اُور دیگر کو بھی شکریہ کہنا ہے۔اُور اُن تمام احباب کا بھی مشکور ہُوں جنہوں نے بذریعہ ایس ایم ایس مجھ سے اپنی چاہت کا اظہار کرتے ہُوئے واپسی کا تقاضہ کیا۔

لیکن گفتگو ختم کرنے سے قبل اُویس بھائی نے جذباتی انداز میں مجھ سے کہا،، عشرت بھائی دُعا کردیں کہ مجھے اپنے کریم آقا صلی اللہُ علیہ وسلم کی سچی محبت نصیب ہُوجائے!!!۔یہ جملہ سننے کے بعد کال اگرچہ ختم ہُوگئی۔ لیکن میں اپنے ماضی میں دیر تک کھویا رَہا۔

یہ وہی دُعا تھی۔۔۔ جو میں اپنے لئے اپنی  ابتدائی جوانی کے ایام سے مانگتا  چلا آرہا ہُوں۔ اُور اب یہی دُعا اپنی آنے والی نسلوں، اپنے دوست احباب و رشتہ داروں کے لئے اکثر مانگتا ہُوں۔لیکن اُن دِنوں کچھ بات ہی اُور ہُوا کرتی تھی۔۔۔ جب میں نے نئی نئی ۔نابیناوٗں کی بستی سے  آنکھ والوں کی جانب ہجرت کی تھی۔ مجھے ہر وقت ایسی محافل کی تلاش رہتی۔ جہاں عشق والوں کا اجتماع ہُوتا ۔۔۔۔ میں ڈھونڈتا ہُوا  ایسی محافل میں پُہنچ جایا کرتا۔۔۔۔ گھر والوں کا  حکم تھا۔ کہ آٹھ بجے کے بعد گھر سے نہیں نکلنا۔ مگر یہ عشق والے محفل نعت کی بزم سجاتے ہی رات نو کے بعد تھے۔۔۔۔ جسکی وجہ سے امی کو رات دیر تک  جاگنا پڑتا۔ تاکہ ابو کی ڈانٹ سے محفوظ رِہ سکوں۔ ابو  (مرحوم)  اُس زمانے میں کہتے ،، میاں اِن مولویوں اُور  باباوٗں کی صحبت سے دُور رَہو۔ یہ  لوگوں کو نکما بنا دیتے ہیں۔۔۔۔ مگر مجھے اِن کے سِوا کوئی  کام والا ہی نظر نہیں آتا۔۔۔۔۔(اگرچہ بعد میں ابو مرحوم بھی میرے خیالات سے متفق ہُوگئے تھے)۔ ابا جان سمجھاتے۔۔ بیٹا کامیاب وُہ ہے کہ،، جسکا بزنس میں کوئی مقام ہے۔ اُور مجھے لگتا!!! یہ سارے بزنس مین ترس کھانے کے قابل ہیں۔ جو اپنی منزل سے ناآشنا ہیں۔

میں جتنا عشق والوں کی محافل میں جانے لگا۔ اُسی قدر تشنگی کا احساس بھی  بڑھنے لگا۔ ایک دِن میں اقبال ضیائی(میرے رفیق) سے کہنے لگا۔۔۔ یار یہ کیا بات ہے ۔۔؟ میں جتنی ذیادہ محافل میں شرکت  کرنے لگا ہُوں۔ اُسی قدر ذیادہ تہی دامن ہُونے کا احساس بڑھنے لگا ہے۔ انہوں نے ایک درخت کی جانب اِشارہ کرتے ہُوئے کہا۔۔۔ یہی تو عشق کا کمال ہے۔ جب عشق کا ،،عین،، سر چڑھ کر بولتا ہے۔ تو درخت کی مثال بن جاتا ہے۔ جیسے درخت میں جتنے پھل ذیادہ ہُوں۔۔۔ وُہ اتنا ہی جھکتا چلا جاتا ہے۔ عشق کی آگ بھی جس قدر ذیادہ ہُو۔ مزید پیاس بڑھا دیتا ہے۔۔۔ جیسے ایک قطرہ بھی میسر نہ ہُو۔ حالانکہ اندر چشموں کی روانی کا یہ عالم ہُوتا ہے۔ کہ،، زمانوں کو سیراب کردیں۔

نوجوانی میں اکثر باتیں مجھے ہراساں و حیران کردیا کرتیں ۔۔۔۔ ایک دِن ذہن میں ایک عجیب خیال آیا۔۔۔  کہ ،،بے ادبوں کو جواب دیتے دیتے ایسا محسوس ہُونے لگا ہے۔ جیسے ہم صرف مصطفے جان رحمتﷺ کی پارٹی کے لوگ ہیں۔ تب بے ادب کس پارٹی کے لوگ ہیں۔۔۔؟ کیا وُہ واقعی اللہ کریم کی پارٹی والے ہیں۔۔۔۔؟ دِل نے جواب دیا۔۔ خُود کو کیوں ہلکان کرتے ہُو۔ کسی عشق والے سے کیوں نہیں پُوچھتے! سُو مُرشد کریم کی بارگاہ میں یہی سوال دہرادیا۔۔۔۔ جو ایمان افروز جواب مِلا۔۔۔ وُہ پڑھیئے۔۔۔ اُور جُھوم جُھوم جایئے۔

مُرشد کریم  سیدنا  حافظ حاجی قاری سراج السالکین سید سراج الدین وارثی (عرف پیارے میاں) ارشاد فرمانے لگے۔۔۔ میاں جسے عشق کی دُولت مِل جائے۔ وہی سکندرِ زمانہ ہے۔ وہی باشاہ، وہی سرخرو۔ وہی  خسارے سے دُور ہے۔ جِسے عشق مُصطفیٰ صلی اللہ علیہ وسلم کی دُولت مِل گئی۔ وہی کامیاب، وہی کامران ہے دُنیا میں بھی اُور آخرت میں بھی۔۔۔ یہی سبق صحابہ  رضوان اللہ علیہ اجمعین ہے۔ یہی متاع  ء اُولیائے کاملین ہے۔ ہمارے مُرشد حاجی  حافظ قبلہ وارثِ پاک بھی تمام زندگی  محبت و عشق کا درس دیتے رہے۔  اللہ کریم نے اُنکی ذات کو سراپا عشق کے رنگ سے سجادیا تھا۔ کیا  شہزادے ،کیابادشاہ، کیا سیاستدان، کیا قاضی، کیا زمیندار ،کیا رہیس اور کیا غریب۔ جو ایک نِگاہ دیکھ لیتا۔ پھر ساری زندگی کسی اُور کو نگاہ اُٹھا کر نہیں دیکھتا تھا۔

پھر عشرت میاں(مجھے یہ نام اُنہی نے عطا فرمایا تھا) یہ کیسے ممکن ہے۔۔۔؟ کہ ،،جسے عشق مصطفی صلی اللہ علیہ وسلم کی لازوال دُولت میسر آجائے۔ وُہ اللہ کریم کی محبت سے بیگانہ رہے۔ کیوں کی مخلوق کی محبت  دراصل خالق ہی سے محبت ہے۔ اُور جو یہ کہے کہ،، مجھے خدا سے تو محبت ہے لیکن اسکی مخلوق سے سروکار نہیں۔۔۔۔ تو وُہ بُہت بڑا جھوٹا ہے۔۔۔ جو محبوب ﷺ سے عشق نہیں رکھتا۔ وُہ ہرگز ہرگز خُدا  سے  بھی محبت نہیں کرتا۔ اسکا دعوی باطل ہے۔ ۔۔۔ اسلئے تمہارے سوال کا آسان جواب یہی ہے کہ،،   جسکے دِل میں عشق  مصطفی ﷺ کی شمع رُوشن ہے۔ وہی مصطفائی ہے۔ وہی عبداللہ ہے۔ اُور بے ادب نہ خُدا کا ہے نہ ہی مصطفےٰﷺ کا ہے۔ وُہ تو شیطان کی پارٹی کا بندہ ہے۔ کیوں کہ شیطان بے عمل نہیں تھا بلکہ بے ادب وگستاخ تھا۔

ادب وعشق والوں کی محفل سے وابستگی نے میرے دِل کو ایک راز سے آشکار کرتے ہُوئے کہا،، جو مخلوق سے محبت اپنی خُواہشات کی تکمیل کے لئے کرتا ہے۔ زمانہ اُسے ذلیل کرڈالتا ہے۔ لیکن اگر یہی عشق مخلوق سے خُدا کی رضا کیلئے کیا جائے۔ تو دُنیا خود اُسکے قدموں میں چلی آتی ہے۔

میں اپنی بیماری کے باوجود بھی صرف آپ لوگوں کیلئے لکھتا رہتا ہُوں۔ کیا میرا آپ پر اتنا بھی حق نہیں کہ مجھے بذریعہ کمنٹس آپ  اپنی ارئے کا حقدار جانیں۔ آپ سب کی رائے کا منتظر۔ آپکا عشرت اقبال وارثی

جِسے چاہے جو عطاکر۔مجھے عشق دے خُدایا۔